ماشَه

شاشة
لونها أبيض وأسود
الصورة فيها مو واضحة
مصنوعة من دفاشة
شاشة

تطل عليها ما تشوف
تظل للصورة ملهوف
ما تلقى للوضوح معنى
تحاول ترسم على ويهك
بشاشة
شاشة

مو راضي يوصل الإرسال
تحاول تصنع آمال
يمكن الوضع يتحسّن
ويفرح سالم ومحسن
وخزنة وعواشة
شاشة

بدال الأريل حط علاق
واعقد مع ارسالك اتفاق
ماكو فايدة مولية
الصورة ضبابية
لو تحط ماشة
شاشة

دبلوماسية

محتاجين بالتعامل شوية رقي ودبلوماسية
صارت الحوارات جدا حادة وخشنة
ترى الحجي ببلاش سمعوني شوية
الردود الجافة ترى والله وبالله تلفتنا
لا نهاجم بعض ونزرع أوهام جذبية
نكسب الكل بكلمة جميلة وحسنة
ليت النائب يوقف قصيصة البطولية
ومن الصراخ والتهديد شوي يرحمنا
محتاجين بكلامنا شوية رقي ودبلوماسية
ترى لغة الحوار الهادية تعمر وطنا

حس أمل

على حس أمل يهدّي ويحسِّن الأمور
وعلى أمل ممكن نشوفه ونلمحه
هذي الدنيا مردها بتلف وبتدور
والوقت بيب الكذاب ويفضحه
مهما حاول بكلامه يلف ويدور
الايام بسهاله تقتل زيفه وتذبحه
فيه جيل واقف على باب الأمل دور
وروحه بحب الكويت مسلّحه
على أمل تتحسن بعيونه كل الأمور
وعلى أمل بيرق أمل يبرق ويلمحه

ريشه

إيه إيه نعم على راسه ريشه
بس بوقت الشدايد ما يصير ريشه
يصمل ويناظر الأمل من الدريشه
وعلى ضوء هالأمل أهو عاش
يتجدد بداخل يوفه انتعاش
حتى لو اصلا السالفه طناش
يقدر يتخيل الحلم ويعيشه

عِبريه

عبريه
يتخطرفون من مكان لمكان
يورّونا من العجب ألوان
لهم زمانهم ولنا زمان
والأيام تبين كلامي ومعانيّه
عبريّه

ناس لهم مصلحة وبيمشون
ناس عايشين عشان يأذون
ناس من الله ما يخافون
مأذينا أذيه

الحياة عندهم محطات
يستغلون أبسط اللحظات
يمشون أمورهم زتات
لا ذمة لامصداقيه

منطقهم الديرة ربيع زايل
يسوون البلاوي والهوايل
وعلى قولة القايل
الدنيا دنيّه
عبريه

حياة

حياة
تمر عليك
شتقدر تخط فيها
رسمة؟
لو كلمة؟
لو حكمة؟
لو ذكريات؟
حياة
بإيدك تصنع لك مكانة
وتفرض وجودك بالدنيا
وتكوِّن لذاتك هوية
وتشرّعلك إثبات
حياة
حسافة لو ضاع عمرك على ماميش
شكثر إحنا أصلاً بنعيش
خل يكون لنا وجود
ولي طرونا يقولون:
حسه ما مات
حياة

يمّه

يا أنقى صدر أضمّه
يمّه
يا فيض مشاعر ملتمّه
يمّه
اشكثر بيضه نيّاتچ
اشكثر نقيه حياتج
اشكثر سهرناج
اشكثر أذيناج
اشكثر بردنا
ودفيتينا بعباتج
ما نطلع من يزاج
وما توفيج كلمه
يمّه