السبت، 27 ديسمبر، 2008

عفسَه


عفسه
ومصير جيل
يضيع بين ناس
ما هي متمرسة
تخاف تقرب الواقع
أو تشوفه
أو تلمسه
عفسه

البلد محتاجه عقول
بالحق تصول وتجول
تنثر علينا الأصول
وبنفوسنا تغرسه
عفسه

لوحة سيراليه


أحوالنا لوحة سيرالية
ما نفهم فيها شي
موليّه
نقول المعنى ببطن الرسّام
ونقول يالله سترك والسلام
ما نحب الأذيّة
أحوالنا
لوحة سيرالية

بزواياها الأمل موجود
بيوفها الياس ما له حدود
بين الأمل والياس عايشين
مثل اللوحة نظل متلونين
بألوان نارية
أحوالنا لوحة سيرالية

هاللوحة نحسها مخربطة
بتباشير الفشل منقطة
نطالع تواصيفها وما إنتحمّل
نحاول أنتمقل وإنتأمل
وعلى هالحالة يوميه
لوحة سيريالية

الخميس، 25 ديسمبر، 2008

زهيرية الإبداع


فاقدين كلمة إسمها الإبداعْ
اللي يصير فينا ترى إبْداعْ
سوالف تصير مالها أي داعْ
صار الرَّجعي للأسف مُبدِعْ
وبأحلامنا الوردية مْبَدِّعْ
بَدِّع يايبا بكيفك بَدِّعْ
التخلف اليوم صار إبداعْ

يبّاب


عذاب بعذاب بعذاب
عيشونا بسراب
نشوفه قريب
وهو بالواقع كذاب
عذاب بعذاب بعذاب

ضيقة خُلق وغلقه
أجراس الفوضى معلّقه
وحبال التخلف موثقه
عشنا ببلدنا أغراب

تسيب ولويه وزحمه
نبي من نور السّنع لمحه
يا زينه والله ويا مِلْحَه
لوما بعض النوّاب

نشوف الأوضاع ونتطمّش
هذا شمّخ وذاك كمّش
وذاك مثابر وهذا طنّش
سمعونّا يبّاب

قند


عند السالفه عند
محد يبي يوايه
العموم يبي يصد
عند

خل راسك يابس
وخل اللعانه واهس
وخل البحامه مثل الشاي
بدون قند
عند

ليش تتفاهم وتتغاضى
راض عندك راضه
وإعشق حب النفس
وطيحله هند
عند
السالفه عند

تشكيل


تشكيل
يتشكّل بريشة أحلام
تساهيل
والخير جدام
كل شي له وزن
وكل وزن له مكاييل
تشكيل

ودنا بملامحه عقلانية
ودنا يحقق لنا أمنية
يهدينا المستقبل عطيّه
ويفرح جيل
تشكيل

يفهم مشاكلنا البسيطة
يحدد ملامح الخريطة
مايخلينا طوفه هبيطة
دمها ثقيل
تشكيل

الأربعاء، 24 ديسمبر، 2008

تقاسيم


نسمع تقاسيم
وبحسها نهيم
سامعين وساكتين
بلاوي شايفين
ما نقول غير
الله كريمِ
تقاسيم

صوت منشز يأذي الأذون
وصوت هادي دافي حنون
الناس يالله ولبهم يسمعون
رياييل يهال وحريم

أوتارنا راخيه يبيلها تنشد
لازم نخلّي لكل شي حد
ترى مصخت عن جد
والله العظيم

طواله


ليمتى على هالحاله؟
مشكلة تنحل
باستكانة شاي
وقعده عرزاله
ومشكله
طوالتها طواله
ليمتى على هالحاله؟

ود وييب واسحب وهات
غير بدِّل اعفس الحياة
طريجنا مافيه اتجاهات
حوادث مشاكل خدم
وعماله
ليمتى على هالحاله؟

نبي خطط همها تنمية البشريه
مانبي كلام وخبطات صحفية
ريحوا بالنا يسلمكم شوية
وإنتنعم بالسنع
قبل العداله
وتزين الحاله

تكتكه

متكتكه
السالفه بكبرها
متكتكه
ملعوبه صح
مقلوبه مفبركه
اللي يحبِّك رِزَّه
واللي مايشتهيك
إتركه
متككه

خل الحيران يحتار أكثر
خل المحتاس بعد يتمرمر
وخل المحتاج زود يتحسّر
وخل المواضيع مشربكه
متكتكه

خل التشربك ماركه مسجله
والأفكار النّيره مكبّلَه
هذي ترى كل المسألة
السالفه متوبكه

مسرح الضمير


الدنيا مسرح كبير
فيها المؤلف
هو الضمير
اللي يرسم فصولنا
اللي يقود عقولنا
وعلى طريجه
نسير
الدنيا مسرح كبير

فلّه


مناهجنا الدراسية
بالتخلف محتلة
مناهجنا الدراسية
فيها علة
من سنين الطواعين
واحنا ندرسها
لا صرنا متطورين
ولا قمنا نحسها
وياها عجلة التقدم
مختلة
مناهجنا الدراسية
بالتخلف محتلة

أكلَ.. شربَ.. نامَ.. قام
طلعَ.. ركبَ.. خمدَ.. فزعَ
التلاميذ صاروا حطب دامه
وللحين أكلَ.. شربَ.. بلعَ
بصراحة فله
مناهجنا الدراسية
بالتخلف محتلة

شلون نصير أمة نووية
وشلون ننافس الدول العظمى
ليش اللوية والأذية
نخلي العقول مظلمة
ونطيحله باجلا
مناهجنا الدراسية
بالتخلف محتلة

ليش ما نعلم عيالنا شنو الدمنة
وشالفرق بين الشوعي والبوم
ياجماعة الخير شفينا إحنا
ليش الطالب من ماضيه محروم
علموه شالفرق بين
شرق وجبلة
مناهجنا الدراسية
بالتخلف محتلة

خبز عروق


الحالة مثل الويه المصفوق
اللي منخطف لونه
والوضع مثل المرقوق
اللي الرقاق فيه
غير نمونه
الحالة ويهها مصفوق

التخبّط هالايام يترارا
الأمل حايشته عساره
نطر البسمه طراره
مثل خبز العروق
الويه مصفوق

براكين من الغضب مقموته
كلمة الصح مقموته
والسنع فات فوته
وصار مايلوق

مراحل


الدنيا أدوار وخطوات ودروب ومراحل
نبتدي بالطريج ونكمل المشوار
كل واحد فينا بداخله ياهل
يحاسبه يلاعبه يعلمه شصار
كل إنسان بداخله شخص ما يجامل
كل إنسان بداخله شخص يغار
عمرها كلمة الحق بالدنيا ما تضاهل
كسرة خاطر يتيم عاش بدمار
اللي بقوله اننا نمشي بمراحل
والشاطر اللي يفهم كل اللي صار

بجوة طفل


كل ماضاقت بك الدنيا
تذكر بجوة طفل
مالقى قوت يومه
كل ما ضاقت بك الدنيا
إزرع بقلبك أمل
لا يكسرك وقتك
بهمومه
كل ماضاقت بك الدنيا
تذكر بجوة طفل

تذكر ناس من أوطانها تشردّت
ماعندها ثمن ثوب
تذكر أطفال إستبردت
من هوايل جوع وحروب
أمانها بداخلها إنقتل
كل ماضاقت بك الدنيا
تذكر بجوة طفل

تبحلق عيون

لاإتطحلطمون
بالهون يا ناس بالهون
هذا يتشكّى ويصارخ
وذاك متقرطم ينافخ
وذاك مبحلق العيون
لاإتحلطمون
يقولون من صبر نال
الوضع يبي أفعال
نصنع بإيدينا آمال
وكان الله بالعون
لاإتحلطمون
لا يصير شعار المواطن التشكّي
ولا يصير العموم متكّي
انفرجي يا أزمه وإنفكّي
أذونا اللي يحنّون
لاإتحلطمون

إجازه


شعب عايش عمره على أمل إجازة
كل همه بس يهج يطق ويسافر
شعب نفوسهم للعطلات معتازة
ما يحبون اللويه والاذية والمعافر
شعب يحب الصبور يكون تازة
يرحبون بجورج وعمر وظافر
ويحبون الناس اللي عندهم غمازة
مسلسلاتهم ثلاث ارباعها مخافر
عرفتوهم؟ ايه عطوهم اجازة
كل واحد فيهم يبي يهج ويسافر

الخميس، 4 ديسمبر، 2008

نمونه


شيسمّونه؟
اللي يصير
شيسمونه؟
الواحد مبحلق عيونه
منشده منخطف لونه
شيسمونه؟
هاللي يصير
شيسمونه؟
نقول حفلة زار جماعيه
نقول لويه وعفسه وأذيه
نقول أربعين بالميه
السالفة مينونه
شيسمونه؟
هاللي يصير
شيسمونه؟
ليش الإحباط تارس أحوالنا
ليش ما يصير النظام
عنوانا
تكفون رحموا آمالنا
ليش هالنمونه؟
شيسمونه

شخري


بري الوطن من بعض ناس بري
أبد لا هم عيال الديرة ولا هم منه
اللي من عرق الفقير يبيع ويشتري
يحرق اللي حواليه ويعيش بجنه
بيظل الوطن ينتظر ويحتري
أمل يداوينا يبارينا ويرحمنا
عالورق بقول اللي بخاطري
باخذ الكلام وأدوزن وزنه
لا يصير العموم عندنا شخري
ملينا لويه وخمبقه وحنه

الاثنين، 1 ديسمبر، 2008

مؤقت


كل شي صار مؤقت
اللجان مباني الوزارات
بكل مكان
وين ما انتقلت
كل شي صار مؤقت
،،،،،
شبرات بكل مكان
أرناق أصناف ألوان
التنظيم بخبر كان
والحالة تردت
كل شي صار مؤقت
،،،،،
على الله تمشي الأمور
تلف فينا الدنيا وتدور
اللي منقمت واللي مقهور
واللي تسمت
كل شي صار مؤقت

زهيرية اللسبه


جم واحد عندنا ودكم إنلسبه
وجم واحد للتخلف صار سبه
وجم واحد يحب يكون مسبه
ليمتى والأحوال ياناس سايبه
الإيد اللي تبني صارت عايبه
كل واحد يفهم ولده وشايبه
ترى الوضع محسوب له حسبه

مصخت


ترى مصخت
والله مصخت
وأرضنا بالتأزيم
تلطّخت
ترى مصخت
،،،،،
حطولنا حد لهالسوالف
لانقول عادي مايخالف
محمل آمالنا واقف
وحبال شراعه ارتخت
ترى مصخت
،،،،،
هالمصاخة ليمتى وياها
بكل عاير قمنا نلقاها
هالديرة شالله بلاها
وشقصتنا مع البخت
ترى مصخت
،،،،،،
ماصخة حالتنا ومُرَّه
الناس وايد محترَّه
شوفوا لنا مسرى
ترى أرواحنا تشلّخت
ترى مصخت

إشاره حمره


الإشاره حمره
وإحنا ناطرين
ضيم شايفين
حامدين وساكتين
الله أدرى فينا
الله أدرى
الإشارة حمره

على أمل تخضر دروبنا
على أمل ترتاح قلوبنا
على أمل نعرف عيوبنا
وتصير الإشارة خضره
الإشاره حمره
إنتلفت على بعض شالسالفه؟
علامها أحوالنا متخالفه؟
سالفتنا عن الصج حالفه
سالفتنا قشره
والإشارة حمره

هِيب


أوضاعنا باختصار يبيلها ترتيب
على مهل وسعه تتحسّن الأمور
ما نحتاج شبل وسميت وهِيبْ
نحتاج منطق ما عليه قصور
ترى سهل علينا نَطيب
نصير فرسان كل العصور
لصوت السنع لا بد نستجيب
نخلق للأماني بيوت ودُور
السالفه شوي يبيلها ترتيب
خذوها مني بتتسنّع الأمور

الاثنين، 24 نوفمبر، 2008

ملّــينا


فهمونا السالفه وشاللي صاير بالضبط
أزمة عالمية وإلا الأمور جميله زينه
الأوضاع مضبوطه لو محتاجه ضبط
بصراحه والله العظيم ترى ملينا
متى نحسّ هالحمل الثجيل إنقطّ
وننسى كلمة ما يخالف وما علينا
نبي بس ترسمون لنا خطّ
ولا تحاتون أبد اللي بيدلّينا
فهمونا السالفه تكفون بالضبط
وإلا الحاله عابره وبترد زينه

الأحد، 23 نوفمبر، 2008

زهيرية وقاده


منطق الصح ترى يحتاج لتلاميذ وقاده
وإن صار العكس تصير النيران وقاده
للأسف يلبسون المغفل وسام وقلاده
والفاهم يحاولون يطفون نوره
يقمتون أمل حصه وسعاد ونوره
العموم يحرق منطق الصح ويخوره
ويخلي نيران التخلف وقاده

قمنده


في ناس بوناستنا مْعَنْدَة
كل شي وصل حدّه
نبي حلم نشوفه
تعب القلب من خوفه
ريحونا بس
مرة وحدة
في ناس بوناستنا معندة
،،،،،،
من يقدر يصنع لنا ابتسامة؟
من يقدر يورينا حِلم بكلامه؟
من اللي مصوّب علينا سهامه؟
وعنده القمندة
في ناس بوناستنا معندة

استجواب



ما عجبكم سووا له استجواب
وشرعوا للتهايم الباب
لا تحسبون له حساب
ما عجبكم سووا له استجواب
،،،،،،،
واللي بروسكم سووه
وإن قدرتوا شيلوه
أصلا السالفة فالتوه
ودايما ينتصر الكذاب
ما عجبكم سووا له استجواب
،،،،،،،
اش ورانا ما عندنا غيركم
ماشين على حس ضميركم
ما أقول غير الله يهديكم
ويرحمنا من هالعذاب
ما عجبكم سووا له استجواب
،،،،،،،،
اوصفوه بأبشع الصفات
طيحوا له قطات ونغزات
واقفة عشانكم الحياة
ولا درينا شالأسباب

السبت، 15 نوفمبر، 2008

زهيرية أنهار


العالم يا عالم تراه انهار
والخساره غطت بحار وأنهار
ظلمة الإفلاس محتاجه نهار

والدنيا غرقت بهموم الديون
العموم صار عالأرض مديون
الحره أحر من جمرة غليون

معذور الواحد يومنه انهار

تيل بطاسه


الوضع وناسه
عاديه السالفه
لا عيون شافت
لا قلوب حاسه
الوضع وناسه
،،،،،،

غيّر مفاهيم الواقع
لا يصير عندك أي مانع
خلّك لجامتك رافع
واللي يحاجيك
كفخه بدبّاسه
الوضع وناسه
،،،،،،

دولكة الفوضى صبها
وعقب ما تصب اقلبها
قول للاحلام خوا يمبها
وتقمص البلاسه
الوضع وناسه
،،،،،

خلهم بلقمة العيش يدوخون
خلهم بالدنيا يلويوون
وقرب صوبك اللي يردحون
وإحنا خلنا
تيل بطاسه
الوضع وناسه

زهيرية الكرامه


من اللي مخلينا حطب دامه
من اللي معيشنا بدوامه
الواحد صبّت عظامه

يبي حل تعب مسيجين
الواقع يجرح جما السجّين
صار الألم بأرواحنا سجين
وترى وايد عندنا كرامه

الأربعاء، 12 نوفمبر، 2008

خمبقه


ليمتى والمشاكل عالشماعه معلقه
إهي مقصوده وإلا إهي غشمره
الصوره تواصيفها حيل مزهلقه
مخططه مضبطه وبغموض مشيره
كل المواضيع تصير معصلقه
شقول غير ترى طرطره
باختصار أسميها أنا خمبقه
مغلفه بعباله وتعب ودندره

الثلاثاء، 11 نوفمبر، 2008

يونيه


ماعندنا مشاكل موليّه
لاصحيه لا فكريه وإسكانيه
الأمور زينه 100 %
بس مشكلتنا الوحيده
الديوانيه

ما عندنا مشاكل موليه
كل موضوع عندنا منتهي
مشاكلنا على ما نشتهي
ما ندري بشنو نلتهي
حاطين همومنا بيونيّه
ما عندنا مشاكل موليه

من قال أصلا عندنا أزمه؟
أحوالنا شزينها دندرمه
الناس كلها مبتسمه
من قال عندنا مشكله اقتصاديه

ما عندنا مشاكل موليه
ترى مشكلتنا صغيرونه
الدوواين تراث لا تموتونه
ليش انتو هالنمونه
حلّوا هالمشكله ونصير أمه
نوويه
تنتهي المشاكل موليه

tv


سحره مجنون
يملي الكون
برامج وأفلام
التلفزيون
يؤذي العيون
سره مكنون
يبيع أوهام وأحلام
التلفزيون
يسلّي الشايب والعيوزه
يمنع الواحد يمد بوزه
نفتر من قناة لي قناة
الأخبار تجيك زتات
وكان الله بالعون
التلفزيون
ممكن يهدم قيم ويدمر
ممكن يبني ممكن يعمر
وينثر الثقافة والعلم
ويوضح لنا معنى الظلم
في بيروت وبيت حانون
التلفزيون

السبت، 8 نوفمبر، 2008

جمود

جمود
الحياة تملّكها الجمود
صار الروتين يخنق
ببرود
جمود

نسينا طعم التغيير
همنا باللي يصير
ما نفكر يومين جدام
نصحى ناكل ننام
وما نبي زود
جمود

الفكر تحجّر من مرض السكون
شقول غير الله يكون بالعون
ودنا تمشي الأمور شويه
والله تعبنا من الاذيه
كل ما نلمح درب نلقاه
مسدود
جمود

أنا حلوه


أنا حلوة
أمشي واثقة الخطوة
يتلفتون علي
يتغزّلون شوي
بعيونهم أنا
وايد أسوى
أنا حلوة

شرايكم بعطري المثير
وايدي اللي تتلف بحرير
شرايكم فيني وانا اتدلّع
وبعذب كلامكم أتنطّع
اللي يقول: أنا كيكه
اللي يقول: أنا بلوه
أنا حلوة

مو مهم عقلي وتفكيري
الناس تحب تنانيري
ما تهتم بالشخصية
أنا أروع بنيه
مو صح ؟
أشوه
أنا حلوة

الخميس، 6 نوفمبر، 2008

اهل بلادي


يا أهل بلادي
احنا بواد
والعالم بوادي
ياأهل بلادي
الكل سبقنا وطافنا
وإحنا على حالنا
على الورق آمالنا
وافادي وافادي
يا أهل بلادي
أكثر بلد فيه مرضيات
أكثر بلد فيه واسطات
ما أقول الحق مات
بس صار كل شي عادي
يا أهل بلادي
يا أهل بلادي
نحارب الكسلان والسمنديقه
واللي ما يعرف يقرا وريقه
نساعد المجتهد بطريقه
ونبعد الربادي
يا أهل بلادي
يا أهل بلادي

لجنة شؤون الإبتسامه


أبي لجنة لشؤون الابتسامه
تخلق للبسمه كرامه
أعضاؤها همهم الفرحه
أبي وجيهم سمحه
وبقلوبهم حب وشهامه
أبي لجنة لشؤون الابتسامه
محاضرها تناقش أسباب النّكد
اللي صاب الشايب والولد
حِس الفرح بيناتنا انفقد
وقمنا انترحّم على أيامه
أبي لجنة لشؤون الابتسامه
يا نوّابنا الناس صارت مقلدمَه
يا نوابنا الجمود ما قمنا نفهمه
تعبنا نلبح وإنّاديكم
عسى الله يهديكم
لا ترفعوا علينا الجامه
أبي لجنة لشؤون الابتسامه

أبجوره


حالتنا حالة الأبجورة
مايلة ومكسورة
ويمها صورة
فيها ماضي جميل
نسيم ذكراه عليل
ورذاذ نافورة
حالتنا حالة الأبجورة
نحاول نبدل بس الليت
وكاشتين بالبيتْ
مو مهم السقف والطوَف
ولا السور اللي صاير انتف
ماهمتنا كل أموره
حالتنا حالة الأبجورة
تشب مرة تطفي مرات
ما نفكر نغيّر البلاكات
نحب الترميم ما نبي انبدّل
ليش أصلا إحنا إنتعدّل
وان إزعلوا
نراضيهم بتسيورة
حالتنا حال الأبجورة

وضع ردي


لحظ ردي؟؟
وإلا الواقع ردي؟؟
أبي أفهم الموضوع
أبي حقي المشروع
وعندي الحق
في ذي
الحظ ردي؟؟
من حقي كمواطن تفهموني
الطريج ظلمه نوروني
بس أبيكم تعلموني
ليمتى والتخلف ورانا
طردي
الحظ ردي؟؟
أقول إن تعدّل وإلا ما أقول
يا الأيواد أبي حلول
باصبر يمكن أنول
شكلي ما راح أنول
إبعدي
الحظ ردي؟؟

مرقه


مرقه!
الحالة مرقه
مخلطه معرفطه
مزهلقه
ظاهرها جميل
وباطنها شقى
الحاله مرقه

محيوسه بقفاش الفوضى
جنا قاعدين بروضه
صار للتفاهه ومضه
لغيوم الحق مشققه
الحاله مرقه

شده وتزول


شدّة وتزول

لا بد لكلمة الحمد لله نقول
حتى لو الأسهم دوم بنزول
الجو حلو والديرة بخير
حالنا أحسن من الغير
ديرة فيها حرب
وديرة فيها سيول
لا بد لكلمة الحمد لله نقول
بدون صراخ ومظاهرات
راح تمشي بهدا الحياة
ويمكن تحلو الأوقات
ومن صبرا راح ينول
لا بد لكلمة الحمد لله نقول
الكويت مو بس سهم وعقار
الكويت وطن وذرى ودار
الكويت دار النشامة والأحرار
لا بد نحبها بأصول
لا بد لكلمة الحمد لله نقول

البدون


البدون
متى بالحل يفرحون؟
متى نستثمر طاقاتهم؟
متى نهنيهم بحياتهم؟
ونخليهم مثل الأوادم
يعيشون
البدون
يتنفسون ضيم وعدم مبالاة
حارمينهم من الحياة
عيالهم كبروا
عيالهم تضرروا
وماتوا قهر
عايشين عشان
يلويوون
البدون

برميل


برميل
سعره يحط ويشيل
برميل
عيّشنا وايد بترف
لين انسحب وانكرف
ويحققلنا المستحيل
برميل
منا الاستهلاك والرباده
ّ
عل
نغنغنا ودّلعنا بزياده
يبني لكل بلد اقتصاده
ويعيشنا بحلم... جميل
برميل
إذا ارتفع ارتفعت مشاكلنا
وكلمالها تصغر لقمتنا
إحنا المظاهر ذابحتنا
ووايد الكسل علينا... يعيل
برميل
يابرميلنا تكفينك إصعد
التقبّس هالأيام تمرّد
إصعد شوي يا معوّد
صار دمنا... ثقيل

الأربعاء، 5 نوفمبر، 2008

زهيرية الفيفا



فشلونا الربع يا الفيفه
خلو أحوال الكرة كسيفه
العموم يبي يمشيها بكيفه

وآخرتها الحبايب وقفونا
حسبي الله عليهم اتلفونا
لعوزونا غربلونا نتفونا
أي والله نتفونا نتيفه
نتيفه

الفيفا: الاتحاد الدولي
لكرة القدم

صار صخر


صار صخر

السوق حمر
والمؤشر بهمنا بطر
السوق حمر
لعب بحسبتنا لعب
خله العموم حَول
وذوقنا من المر... الأمر
السوق حمر
ناس من الحره تسحق زجاير
ناس عقلهم منهم طاير
رهنوا بيت وعماير
والقلب انشطر... السوق حمر
د
ْ
ناس اطمعوا وراحوا بل
ناس ذبحهم الجشع والعِند
أول يلعبون كوت وهند
واليوم بوزهم بوز شبر...السوق حمر
الصبر زين شبتسوّون يعني
ي
ّ
ياعبادين وبوشميس وحمن
ي
ّ
سمعوها ياناس من
قطوا همومكم بحر... السوق حمر

ملاس


ملاس
محتاس
أراقب الأمور ومعلق أجراس
لكل أصول الغلط
مهما صار.. مهما الحظ
راح وقفط
بحب ديرتي.. رافع الراس
ومحتاس
معلم نفسي ما أتندّم
أباري آلامي ما أتألم
أقول كل شيء يتبدّل
بنرد أحسن من الأول
عايش حياتي.. على هالأساس
ومحتاس
ممكن باجر يمكن غير
يمكن نصبح على خير
أسكت وأداري خوفي
وأكذب هواجيس يوفي
وأقول:
اللي بالجدر .. يطلعه الملاس
ومحتاس

إداد

اول قصيده في جريدة الصوت

إدّاد
بدا دور الانعقاد
رحمونا يالأيواد
ما نبي غير شيين:
خافوا الله فينا
وعلى هالبلاد
بدا دور الانعقاد
تكفون يا مشرّعين
نبي من يساعد ويعين
خلوا همكم المستقبل
رحموا هيا وحسين ومجبل
وبو ولاّد
بدا دور الانعقاد